Kristalet e përbërjeve jonike nuk e përcjellin rrymën elektrike. Megjithatë, kur kristalet shkrihen dhe lëngu i shkrirë vendoset në një celulë elektrolitike, vihet re kalimi i një rryme elektrike. Ndodh një reaksion kimik, në të cilin kripa jonike shpërbëhet në elementet e saj.

Tabela 6.1 tregon elektrolizën e disa përbërjeve binare jonike, të shkrira. Plotësoni tabelën duke shënuar produktet në elektroda pas elektrolizës. Plotësoni kolonën e fundit të tabelës me vëzhgime për produktin që çlirohet në anodë.

KËSHILLË: Gjatë elektrolizës, metalet ose hidrogjeni formohen në katodë, ndërsa jometalet (përveç hidrogjenit) formohen në anodë.